Ylli i Lazios, Milinkoviç Saviç, është sërish në qendër të vëmendjes në tregun e transferimeve. Këtë herë garën për shërbimet e mesfushorit e kryeson skuadra franceze e PSG-së.
E ardhmja e serbit, prej tre vitesh tashmë është folur të jetë larg kryeqytetit italian, por të gjitha marrëveshjet për të nënshkruar me lojtarin kanë dështuar, ku në të kaluarën e interesuar ka qenë Manchester United.
Ndërsa tashmë, sipas Gazeta dello Sport, PSG ka bërë përpjekjen e parë për Saviç, teksa kanë kontaktuar me presidentin Claudio Lotito. Sipas medieve italiane ky i fundit kërkon për futbollistin rreth 100 milionë euro, ndërsa PSG kërkon që ta mbyllë marrëveshjen për shifrën e 90 milionë eurove.
Gjithçka pritet të marrë formë në muajt në vijim, por e sigurt është fakti që PSG kërkon të përforcojë mesfushën dhe serbi është një garanci në këtë aspekt, nga ana tjetër Lazio do të tentojë të përfitojë sa më shumë nga “xhevahiri” i saj.
