Prej më shumë se 10 ditësh zyrtarëve të bashkisë së Tiranës iu kërkua nga prokuroria të dorëzojnë kontratat që kanë të bëjnë me dhënien në administrim të landfillit të Sharrës.
Pas vdekjes së 17 vjeçarit, Ardit Gjoklaj organi i akuzës ka nisur hetimet edhe për mënyrën si e fitoi kompania 3R administrimin e landfillit, raporton Abcnews.
Bashkia e Tiranës nuk ka dorëzuar në prokurori asnjë dokument që provon se Edurim Teqja, aktualisht person i shpallur në kërkim, e fitoi sipas ligjit administrimin e landfillit, ku selektonte mbeturinat.
Prokurori Julian Zonja, iu drejtua Bashkisë së Tiranës me një urdhër sekuestrimi, ku kërkon t’i vihet në dispozicion e gjithë praktika e funksionit të Sharrës. Në vendimin e sekuestrimit, prokuroria kërkon kontratën me ndërmarrjen publike të Bashkisë së Veronës në Itali për administrimin e mbetjeve urbane.
Dosjen e plotë, të kontratës së nënkontraktimit, që Bashkia e Tiranës bashkë me kompaninë italiane kanë bërë me shoqërië 3R, që administrohen nga personi i shpallur në kërkim Edurim Teqja. Dyshimet janë se Erjon Veliaj me vartësit e tij nuk kanë një praktikë konkrete të zhvillimit të tenderit për mënyrën e dhënies në administrim të landfillit të Sharrës për selektimin e mbeturinave urbane. Mësohet se prokuroria kërkoi nga Bashkia t’i vihen në dispozicion procesverbalet e monitorimit të landfillit të Sharrës, nëse një inspektim të tillë është kryer. Por edhe pse kanë kaluar mbi 10 ditë nga nisja e këtyre urdhrave të sekuestrimit, Bashkia ende nuk i ka kthyer një përgjigje prokurorisë.
Prokurori gjithashtu kërkoi nga Qendra e Regjistrimeve të Biznesit t’i vihen në dispozicion formularët dhe dokumentet që kompanitë, si ajo italiane ashtu edhe shoqëria 3R, kanë dorëzuar pranë QKR-së.
Pas vdekjes së Ardit Gjoklajt në Sharrë u zbulua se aty punonin dhjetëra vetë të pasiguruar. 5 persona janë proceduar penalisht. Përgjegjësi i turnit kur ndodhi vrasja e të riut 17 vjeçar dhe shoferi i fadromës nga e cila mendohet se ka gjetur vdekjen Ardit Gjoklaj ndodhen në burg. Pronari i kompanisë 3R, që shfrytëzonte fëmijët në landfillin e Sharrës, njëkohësisht kryetar i PS në Peqin është shpallur në kërkim.
