Kreu i Grupit Parlamentar të PS-së, Taulant Balla, ka vijuar akuzat ndaj Presidentit Ilir Meta. Nga salla e Parlamentit, Balla akuzoi Metën për përpjekje që dëmtojnë Shqipërinë në rrugën e integrimit europian, pas rekomandimit të dha Komisioni për hapjen e negociatave.
Madje Balla foli edhe mbi një takim me 4 diplomatë të vendeve të BE-së, vetëm 1 orë pasi kishin takuar Presidentin Ilir Meta.
“Dje pasdite zhvilluam një takim me diplomatë të katër vendeve të BE. Në asnjë moment këto vende nuk e vënë në dyshim raportin e KE që vlerëson që prej vitit 2018 fillimin e bisedimeve për Shqipërinë. Ky Kuvend bashkë me shumicën parlamentare është një reflektimi i asaj që 97% e shqiptarëve mbështesin rrugën europiane të Shqipërisë.
Ne duhet të jemi gjithmonë së bashku. Bashkë me kolegët e opozitës parlamentare jemi ndjerë të trishtuar nga qasja që Presidenti i Republikës kishte pasur ndaj diplomatëve të BE një orë para takimit me ne.
A thua se kishin folur me një President të një vendi kundërshtar me Shqipërinë, ndërkohë që ne duhet të kemi qasje me vlerësim e dashuri për vendin tonë.
Nuk dua të zgjatem më tej se si me lloj letrash drejtuar presidentëve dhe kryeministrave të vendeve të BE, Ilir Meta bashkë me ndonjë faktor të opozitës, e më vjen keq se si PD u bë shtojcë e Metës, ka përpjekje për të dëmtuar vlerësimin që dha KE të hënën e që mezi presim që në tre ditët e Keshillit Evropian të marrim një lajm pozitiv.
Dua të shpreh vlerësimin që pas shumë kohësh Këshilli Kombëtar për integrimin ka një axhendë intensive sa i përket drejtësisë që mbetet gur themeli për integrimin”, u shpreh Balla.
