Policia E Tiranës, ka zbuluar një laborator që shërbente për krijimin e dokumenteve të falsifikuara dhe ka ekzektuar mbrëmjen e djeshme, operacionin e koduar “Laboratori”, të ndjekur prej 1 viti. Në pranga janë vënë 6 persona mes tyre dhe një femër, ku më herët janë arrestuar dhe 6 të tjerë.
Personat e arrestuar janë shtetasit: L. Sh., 56 vjeç, Agron Hoxha 64 vjeç, Myslym Hysko, 56 vjeç, Valbona Babeni, 57 vjeçe, Enzo Hysko, 29 vjeç, banues në Tiranë dhe Henri Kurti, 63 vjeç, banues në Lezhë.
Po gjatë kohës së ndjekjes së operacionit janë arrestuar më parë edhe shtetasit Artor Tahiri, Ermir Staka, Vesel Serjani, Edmond Rexha, Pajtim Baruti dhe Thanas Dodhri.
“Këta shtetas, në bashkëpunim me njëri – tjetrin kryenin falsifikimin e dokumenteve të ndryshme, për të bërë të mundur kalimin e paligjshëm të kufijve për në vendet e BE-së, me qëllim qëndrimin si rezident, si dhe përdorimin e dokumenteve për transit në Angli” thuhet në njoftimin e policisë.
Në cilësinë e provës u sekuestrua laboratori që shërbente për krijimin e dokumenteve të falsifikuara, i cili funksiononte në banesën e dytë të shtetasit L. SH. Gjithashtu u sekuestrua një automjet dhe 11 aparate celular.
Materialet procedurale i kaluan Prokurorisë pranë Gjykatës së Shkallës së Parë Tiranë, në ngarkim të shtetasve të mësipërm, për veprat penale “Falsifikimi i letërnjoftimeve, pasaportave ose i vizave” dhe ”Ndihma për kalim të paligjshëm të kufirit”.
