Ministrja e Arsimit Besa Shahini ka reaguar disa orë pas helmimit të rreth 50 nxënësve në shkollën “Janaq Kinica” të Fierit.
Shahini tha se pas kësaj ngjarjeje do të shtohen oficerët e sigurisë në shkolla, ndërsa tha se ndaj nxënësve të përfshirë në këtë ngjarje do të merren masa.
“Është një ngjarje e patolerueshme, ndaj shkolla do të marrë masa ndaj të gjithë nxënësve të përfshirë.
Nuk e dimë llojin e spray që është përdorur dhe po presim analizat”, tha Shahini.
Ajo shtoi se do të gjendet edhe personi që hodhi spray, ndërkohë që më herët policia njoftoi se dyshohet se ishte përdoror një spray me piper, ndërsa ai ishte hedhur nga një nxënës që është identifikuar.
““Herën e parë menduam se ishte një pakujdesi. Hera e dytë nuk tolerohet më, merr përmasat e një krimi. Janë marrë të gjitha mostrat e nevojshme nga prokuroria. Flitet se shkak është bërë nje pajisje që kanë përdorur nxënësit.
Do t’i gjejmë nxënësit që kanë hedhur sprajin piper në shkollë”, shprehet Besa Shahini.
Më herët u njoftua se ministrja Shahini mund të kishte dhënë dorëheqjen, pasi prej saj nuk pati asnjë reagim mbi ngjarjen, e cila ndodhi rreth orës 11:00.
Shahini preferoi të reagoi 3 orë më pas, ndërkohë që më herët kishte reaguar Ministria e Shëndetësisë.
