Sekretari i Përgjithshëm i PD, Gazment Bardhi, ka postuar në faqen e tij në rrjetet sociale një thirrje tjetër për pjesëmarrje në manifestimin e datës 2 mars pasdite në Tiranë.
“Kur shkelet Kushtetuta, bie shteti, bie demokracia, cënohen të drejtat e njerëzve”, shkruan Bardhi.
Sipas tij, Kushtetuta është marrëveshja më e rëndësishme e një shoqërie që garanton bashkëjetesën tonë.
“Kur shkelet Kushtetuta, bie shteti, bie demokracia, cenohen të drejtat e njerëzve. Çdo qytetar duhet të reagojë. I ftoj anëtarët dhe mbështetësit e Partisë Demokratike të bashkohen në manifestimin e 2 Marsit, në mbrojtje të Kushtetutës, në orën 17:00, në Bulevardin Dëshmorët e Kombit”, shkruan Bardhi.
Presidenti Ilir Meta ka thirrur manifestimin për mbrojtjen e Kushtetutës, pasi Parlamenti miratoi ndryshimin e procedurës së betimit të anëtarëve të Gjykatës Kushtetuese.
Meta ka paralajmëruar firmosjen e dekretit të parë kundër atij që e quan “grusht shteti”. Me shumë gjasë dekreti që do të firmoset nga Meta ka lidhje pikërisht me kthimin e ligjit për ndryshimin e procedurës së betimit.
