Një ditë para manifestimit të thirrur nga Presidenti Ilir Meta, në mbrojtje të Kushtetutës, Kryeministri Edi Rama duket se ka zgjedhur mënyrën për t’a provokuar, ndërsa ka mbledhur të rinjtë e FRESSH-it, në ditën e 3-të të Kongresit të PS-së, në sheshin “Nënë Tereza”, vetëm pak metra larg Presidencës.
Madje, Rama nuk ka nguruar të thumbojë edhe manifestimin duke u shprehur “Beslidhja apo Beslikja, nuk mund të jetë debati që të na mbajë të mbërthyer”.
“Nuk është debati Besëlidhja dhe Beslikja, që ka marrë vëmendje. Kush është me Besëlidhjen, kush është me Besëliken, pa kuptim, humbje kohe, degradim i madh dhe goditje e shpresës se në këtë vend mund të jetohet normalisht dhe se ky vend nuk është peng i atyre që shfaqen në TV sikur janë ata dhe pas tyre s’ka gjë tjetër.
Mjafton të dëgjosh këtë që keni mbrapa, për të kuptuar deri ku shkon çmenduria. Mjafton të hapësh TV dhe larg qoftë të shohësh ndonjë debat, për të parë deri ku shkon gjuha dhe çfarë lirie për të shthurur gjuhën kanë njerëzit këtu. Por kjo nuk është liri demokratike e jetës, pasi këtë e përcakton fakti sa dëgjohesh dhe sa ndërveprim ka”, tha Rama.
Kryeministri tha se mjafton të dëgjosh “këtë që keni mbrapa ju për të kuptuar se deri ku shkon në Shqipëri liria për t’ia futur kot dhe askush nuk të thotë gjë”.
“Duhet ndërtuar rruga se si gjërat të thuhen dhe të dëgjohen. Ne kemi një situatë demokratike që besoj në nivelin e gjërave që thuhet nuk na e kalon njeri. Mjafton të dëgjosh këtë që keni mbrapa ju për të kuptuar se deri ku shkon në Shqipëri liria për t’ia futur kot dhe askush nuk të thotë gjë.
Mjafton të hapësh tv dhe larg qoftë të shohësh ndonjë debat për të parë se çfarë lirie kanë njerëzit për ta shthurur gjuhën. Kjo nuk është cilësi demokratike e jetës. E përcakton fakti se sa dëgjohesh dhe se sa ndërveprim ka. Këtu është bërë fol, fol por kush po të dëgjon”, tha Rama.
