Sekretari i Përgjithshëm i PD, Gazment Bardhi ka reaguar pas konferencës për shtyp të ministres së Drejtësisë, Etilda Gjonaj, e cila iu përgjigj akuzave të ngritura nga presidenti Ilir Meta. Bardhi shkruan në rrjetet sociale se Gjonaj gënjeu, pasi sipas tij, ministrja e Drejtësisë ka shkelur Kushtetutën duke i rrëmbyer presidentit anëtarin në Gjykatën Kushtetuese.
Reagimi i Bardhit
Në vend që të mashtrojë qytetarët, Etilda Gjonaj bën mirë të gjejë një avokat. Sikur Edi Rama vetë të drejtojë personalisht mbledhjet e SPAK-ut, ajo është e pambrojtshme. Ministrja e Drejtësisë ka shkelur Kushtetutën, ka shpërdoruar detyrën dhe ka marrë pjesë në një akt mafioz për asgjesimin e Gjykatës Kushtetuese.
Provat e paraqitura nga Presidenti për grabitjen e një anëtari të Gjykatës Kushtetuese nga ana e qeverisë, edhe përmes veprimeve të paligjshme të Ministres së Drejtësisë, janë të qarta dhe të pakundërshtueshme. Etilda Gjonaj duhet të japë llogari para drejtësisë! Është një test i rëndësishëm për SPAK-un, i cili do të tregojë, nëse reforma në drejtësi ka dështuar me gjithçka apo jo.
