Në fjalën e tij në konferencën për “Sfidat dhe zgjidhjet në shëndetësi” të organizuar nga fondacioni Konrad Adenhauer, ish-kryeministri Berisha ka folur për shëndetësinë e qeverisë Rama. Berisha është shprehur se në Shqipëri infermierët dhe mjekët paguhen sa gjysma e atyre në Kosovë.
Po ashtu, ai tha se investimet në Shqipëri në fushën e shëndetësisë janë zero. Berisha e mbylli fjalën e tij duke thënë se Rama është kanceri i mjekësisë shqiptare.
“Ku janë investimet, pothuajse zero investime në shëndetësi. Kanë dy muaj që reklamojnë një spital pothuajse të përfunduar në vitin 2012. Po e paraqet si investimin më të madh në shëndetësi. Edhe atij i reduktuan sallat e operacionit dhe i hoqën 40 shtretër. Çdo ditë po largohen mjekë se ky mashtrues po u thotë se po i paguan si në Gjermani. Ku janë rrogat e mjekeve, ku janë rrogat si në Gjermani për inferimerët? Mjeku në Shqipëri merr sa gjysma e mjekut në Kosovë. Në Kosovë merr 850 euro, në Shqipëri as gjysmën e saj. Kjo është një politikë shkatërrimi. Dje Rama tregoi një banditizëm ndaj një studenti të mjekësisë në sallën e diplomimit. Me atë akt ke rrahur të gjithë studentët e mjekësisë. Ai tha një të vërtetë. Kanceri i mjekësisë shqiptare është Edi Rama”, deklaroi ai.
