Vetëm 24-orë pas ndeshjes mes Kukësit dhe Tiranës që luhet ditën e premte, në stadiumin “Air Albania” do të luhet edhe ndeshja mes Partizanit dhe Bylisit.
Partizani ka njoftuar zyrtarisht tifozerinë e tij, se sfida shumë e rëndësishme e javës së 23-të, ajo me Bylisin, ditën e shtunë do të luhet në impiantin e ri.
Partizani kishte bërë kërkesë që kjo ndeshje të luhej në “Air Albania Stadium” prej disa ditësh, por kjo gjë ishte marrë me skepticizëm pasi shumë mendonin se duke marrë parasysh problemet e shumta që ka hasur fusha, nuk dihej nëse organizimi i dy ndeshjeve brenda 24-orësh do të ishte i mundur.
Së fundmi në këtë stadium janë zhvilluar dhe ndeshjet e Kombëtares U16 të femrave, ndërsa tapeti është shfaqur shumë i dobët, njëjtë si në takimin çelës që Shqipëria zhvilloi kundër Francës.
