Komisioni Europian pritet të prezantojë sot metodologjinë e re të zgjerimit të BE-së, ku pritet të parashikohen rregulla më të forta për vendet që kërkojnë të anëtarësohen në bllok dhe një debat më të gjerë se si ta bëjnë BE-në më efektive.
Komisioni Evropian do të propozojë një rregullim të procesit të zgjerimit në një përpjekje për të gjallëruar ofertat e kandidaturave të Shqipërisë dhe Maqedonisë së Veriut që Macron vuri veton vitin e kaluar, shkruan Bloomberg.
Franca dhe 26 anëtarët e tjerë të BE-së kanë tashmë shumë mundësi për të vënë veton ndaj procesit të pranimit që përfshin negociata të zgjatura ndër vite apo edhe dekada. Çdo shtet anëtar mund të bllokojë përparimin e një kandidati në çdo pikë të procesit.
Duke riafirmuar fokusin në “pasojat negative” dhe “kthyeshmërinë” nëse vendet kandidate tërhiqen ndaj reformave të kërkuara, Komisioni synon të sigurojë mbulim të mjaftueshëm politik për Presidentin francez Emmanuel Macron për të hequr kundërshtimin e tij në bisedimet e anëtarësimit me të dy vendet nga Ballkani Perëndimor.
Kur Macron vuri veton ndaj procesit tetorin e kaluar, ai u përball një qortim jashtëzakonisht të fortë nga kancelarja gjermane Angela Merkel.
Një zyrtar në Paris tha se qëndrimi i qeverisë franceze nuk ka ndryshuar.
“Ndërsa metodologjia e re e propozuar do të ishte e mirëseardhur, nuk do të rihapë automatikisht procesin e zgjerimit për Maqedoninë e Veriut dhe Shqipërinë, pasi këto janë dy tema të ndryshme”, shtoi zyrtari.
Në një front tjetër të nxitur nga presidenti francez, të dërguarit e qeverisë së BE në Bruksel do të kërkojnë një qëndrim të përbashkët për “Konferencën për Ardhmërinë e Evropës” – një diskutim dy-vjeçar që synon të gjallërojë bashkimin evropian.
Mbështetësit e Macron në Bruksel thonë se presidenti francez është i vetmi udhëheqës i BE-së që shtyn bllokun – i zhytur tradicionalisht në inerci – për të diskutuar drejtimin e tij strategjik. Për kritikët, ambicia e tij është joreale dhe përçarëse dhe nuk ndihmon procesin e vendimmarrjes.
