“Si platformë është miratuar nga kryeministri që në nentor dhe nuk është se ka pasur ndonjë urgjencë të tillë që duhej të bëhej me akt normative, që nga nëntori deri në fund të janarit fare mirë mund të ishte bërë një procedurë normale.” – u shpreh avokati i njohur Ledio Braho në lidhje me paketën Anti-KÇK.
Ai e cilësoi paketën anti-KÇK si anti-Kushtetuese dhe që kufizon të drejtat e njeriut. I ftuar në “Dita jonë”, Braho shprehet se kjo paketë i jep një tagër të paprecedentë Policisë së Shtetit, ndërsa shton se nuk ka pasur asnjë ngutje që qeveria të miratonte nismën si akt-normativ. Në këtë kuadër Braho shprehet se shkaku ka të bëjë me shmangien e Presidentit, pavarësisht qëndrimit që mund të kishte ai.
“Kemi të bëjmë me një akt normative dhe fakti që kemi të bëjmë me një akt normative dhe që kufizohen të drejtat dhe liritë e njeriut kjo është diçka anti-kushtetuese. Kushtetuta parashikon që të drejtat e njeriut mund të kufizohen vetëm me ligj, sado që në bazë të nenit 101 të Kushtetutës kemi të bëjmë me një akt normative që ka fuqinë e ligjit ai nuk mund të quhet ligj sepse është miratuar nga Këshilli i Ministrave dhe brenda 45 ditëve duhet të miratohet dhe nga Kuvendi por në fuqi ka hyrë që në momentin që është miratuar nga Këshilli i Ministrave.
Normalisht kjo si platformë është miratuar nga kryeministri që në nentor dhe nuk është se ka pasur ndonjë urgjencë të tillë që duhej të bëhej me akt normative, që nga nëntori deri në fund të janarit fare mirë mund të ishte bërë një procedurë normale. Fakti që u bë në këtë mënyrë duket se është bërë për të shmangur veten nga Presidenti i Republikës sepse duke marrë fuqinë akti normativ që nga miratimi do miratohet në Kuvend ne e dimë sesi është Kuvendi sot dhe pavarësisht nëse e kthen presidenti apo se kthen herën e parë fuqia do të vazhdojë dhe për këtë arsye hyri në fuqi që ditën e shtunë.
Partnerët ndërkombëtarë e kanë kritikuar normalisht këtë pjesën e mosbërjes transparente të draftit pasi shqiptarët e kanë mësuar pasi është botuar në fletoren zyrtare edhe partnerët pasi ky akt normative është i ndryshëm nga ai që u prezantua në nëntor të vitit 2019. Tjetër problematikë është ajo që ka të bëjë me dublimin e institucioneve, OFL dublon BKH-në, po të lexosh aktin normative në asnjë nen të tij nuk ka parashikime në lidhje me BKH-në ndërkohë që ka për SPAK-un dhe Gjykatën e Posaçme. BKH-ja është krijuar për të qenë një polici gjyqësore jo në varësi të ekzekutivit. OFL është komplet në varësi të Drejtorit të Përgjithshëm të Policisë së Shtetit dhe duhet të kemi parasysh se është i njëjti drejtor, i njëjti ministër i Brendshëm, i njëjti kryeministër pra në Shqipëri nuk ka patur ndonjë ndryshim regjimi që të sillte dhe urgjencën e një ndërmarrjeje të tillë. Kjo hedh shumë dyshime se kush do jenë efektet reale.
Shqipëria i ka të gjitha ligjet për vendosjen e sekuestros, është ligji i Anti Mafias që këto sekuestro duhet të ishin vendosur që më parë, pra nuk është se ka ndonjë risi. Moszbatimi i ligjit nuk do të thotë që ne të krijojmë institucione të reja, organe të reja që t’i shfrytëzojmë dhe për çështje ekstraligjore, sepse ajo që mund të ndodhi duke qenë në kompetencë totale të Drejtorit të Përgjithshëm të Policisë, pra OFL-ja i dërgon një formular subjekteve dhe subjektet brenda 48 orëve plotësojnë formularin tani kjo është një nonsense pasi cenon parimin e sigurisë juridike pasi si mundesh t’i të justifikosh pasurinë për 48 orë.” – u shpreh avokat Braho.
