E ndërsa rruga e refugjatëve në Ballkan është ndërprerë dhe Maqedonia e Kroacia kanë mbyllur kufijtë, duke se do ketë një zhvendosje të tyre përtej fjalëve, drejt Shqipërisë. E me sa duket ata janë grumbulluar tashmë në afërsi të kufirit Greqi-Shqipëri, pasi të premten, 100 prej tyre janë vendosur në një kamp provizor, në qytezën e Konicës dhe këtë e pohojnë mediat greke.
Refugjatët kanë qëndruar me ditë të tëra në portin e Pireut dhe transferimi i tyre për në Konicë, bën pjesë në aksionin e qeverisë greke për të lehtësuar mbipopullimin në mjediset e portit. Në fakt janë 3 zona ku autoritetet greke kanë planifikuar të mbledhin emigrantët, një prej tyre Janina.
Mbrëmjen e të enjtes në Pire ndodheshin rreth 5.000 refugjatë.
Qeveria greke u ka kërkuar njësive vendore, të raportojnë për mjediset që disponojnë dhe që mund të kthehen në qendra të pritjes së refugjatëve, por ato janë përgjigjur negativisht.
Mes tyre edhe bashkitë e Kosturit dhe Follorinës, që gjithashtu ndodhen pranë kufirit me Shqipërinë kanë thënë se nuk kanë mjedise.
Në Konicë, refugjatët do të strehohen në çadra ushtarake dhe fillimisht është thënë se do të qëndrojnë aty për një kohë të shkurtër. Kryeministri i Shqipërisë, Edi Rama, gjatë një deklarate në shkurt është shprehur se Shqipëria nuk ka as kushtet as fuqinë dhe as entuziazmin për të shpëtuar botën ndërkohë që vendet e tjera po mbyllin kufijtë e tyre.
(Boldnews)
