David Sassoli, Presidenti i PE-së, do të vizitojë Tiranën ditën e hënë, ku pritet të ketë takime zyrtare të nivelit të lartë, përfshi edhe një fjalë përshëndetëse para Kuvendit të Shqipërisë.
Në axhendën e takimeve përfshihen Presidenti Meta, Kryeministri Rama, Kryeparlamentari Ruçi, kreu i PD-së, Basha, ish-ministrja e Integrimit Gjosha, Kryebashkiaku Veliaj, si dhe një bashkëbisedim me studentë.
Ndërkohë në një mesazh para nisjes së vizitës zyrtare, Sassoli ka konfirmuar mbështetjen ndaj Shqipërisë dhe Maqedonisë së Veriut për hapjen e negociatave.
“Po shkoj në Shqipëri për të inkurajuar dhe dhënë shpresë për rrugën përpara, pas disa muajve të vështirë për vendin.
Së pari, unë do të doja të përsërisja solidaritetin tim me Shqipërinë dhe njerëzit e saj pas tërmetit shkatërrues në fund të nëntorit. Paraja nuk mund të zhbëjë vuajtjet, por është shumë e nevojshme të rindërtohen shtëpitë dhe infrastruktura.
Së dyti, dua të rikonfirmoj mbështetjen e fortë të Parlamentit Europian për hapjen e bisedimeve të pranimit me Shqipërinë dhe Maqedoninë e Veriut. Të dy vendet kanë bërë përparim të madh, në përputhje me pritshmëritë tona.
Fillimi i negociatave mund të jetë një shtysë e fortë për reformat që janë ende të nevojshme në rrugën drejt BE. Ne do të bëjmë çmos për të bindur shtetet anëtare që ende kishin rezerva në mbledhjen e fundit të Këshillit europian”, ka deklaruar Sassoli.
