Lulzim Cuko, 45-vjeç autori i krimit makabër në familje në Xhafzotaj të Durrësit është vetëdorëzuar në Polici.
Para para mesnatës ai vrau me thikë bashkëshorten e tij, Majlinda Cukon, 33-vjeç në sytë e tre fëmijëve të mitur dhe më pas u arratis nga vendngjarja.
Ai e qëlloi tre herë me thikë bashkëshorten e tij pas një konflikti për motive të dobëta. Ishin fqinjët ata që dëgjuan të bërtiturat e 33-vjeçares dhe njoftuan Policinë.
Menjëherë pas krimit makabër, uniformat blu ishin në kërkim të autorit, por ai është dorëzuar vetë në ambjentet e komisariatit të Policisë së Burrelit para pak minutash.
Mësohet se çifti ka tre fëmijë, një djalë dhe dy vajza, të moshës dhjetë, shtatë vjeç dhe 2 vjeç. 45 -vjeçari shkonte herë pas here në Greqi, ku punonte si emigrant.
Njoftimi i Policisë së Durrësit:
Në lidhje me ngjarjen e ndodhur në Xhafzotaj, më datë 01.02.2020, ku shtetasi Lulzim Cuku, 45 vjeç, qëlloi me mjet prerës thikë, bashkëshorten e tij shtetasen M.C. 33 vjeçe, e cila për pasojë ndërroi jetë, ju informojmë se;
Policia e Durrësit pas njoftimit të marrë në lidhje me ngjarjen është vënë në ndjekje të autorit duke bashkëpunuar dhe me DVP Tiranë e DVP Dibër.
Gjithashtu nga shërbimet policore u ushtrua kontroll në shumë objekte e ndërtesa ku dyshohej se mund të fshihej autori.
Autori i dyshuar i ngjarjes, shtetasi Lulzim Cuku, si pasojë e trysnisë së Policisë është vetëdorëzuar në Komisariatin e Policisë Burrel.
Shërbimet e e Komisariatit të Policisë Durrës po mbërrijnë në Komisariatin e Policisë Burrel për të shoqëruar autorin në DVP Durrës për veprime të mëtejshme.