Qeveria miratoi një ditë më parë paketën ligjore të njohur si anti-KÇK, e cila ishte paralajmëruar nga Kryeministri Edi Rama prej disa muajsh. Në draftin e bërë publik në faqen zyrtare të Këshillit të Ministrave, bie në sy fakti se Policisë së Shtetit i jepen kompetenca që sot i ka Prokuroria dhe Gjykata.
Më specifikisht në nenin 33 të draftit, policisë i jepet e drejta që në bashkëpunim me operatorët telefonikë dhe ato që ofrojnë shërbimet e internetit, të merren të dhënat e përdoruesve, pa pasur nevojën e një vendimi gjykate apo urdhëri të Prokurorisë. Këto të fundit njoftohen, pasi policia ka përgjuar individët për të cilët ka dyshime se mund të jenë pjesë e krimit të organizuar, apo po përgatisin akte-terroriste.
“Kur në bazë të informacioneve që disponohen nga OFL-ja/Njësia Antiterror në Policinë e Shtetit dyshohet se subjekti i këtij akti normativ po planifikon, organizon apo merr pjesë në kryerjen e një krimi të organizuar apo veprimtarie terroriste dhe kjo veprimtari nuk mund të zbulohet dhe të parandalohet në mënyra të tjera apo me aplikimin e masave parandaluese të parashikuara nga ky akt normativ, drejtuesi i OFL-së, vetëm ose në bashkëpunim më drejtuesin e Njësisë së Antiterrorit, nëse jemi në kushtet e dyshimit për veprimtari terroriste, mund të kërkojë akses për strukturat e policisë:
a) në operatorët që përdorin rrjetet dhe ofrojnë përdorimin e shërbimeve elektronike e telefonike të çdo lloji, për identifikimin në kohë reale të subjektit a numrit të telefonit, të numrit të aparatit telefonik (IMEI) apo lokalizimin e antenave loguese të dy komunikuesve, si dhe krijimin e mundësive të identifikimit të përdoruesit fundor të internetit;
b) në operatorët që përdorin rrjetet dhe ofrojnë përdorimin e shërbimeve elektronike për komunikimin dhe postën elektronike, përfshirë internetin, ndër të tjera, edhe për identifikimin në kohë reale të përdoruesve të internetit me IP publike;
c) në database e regjistra elektronikë të institucioneve shtetërore dhe subjekteve private të licencuara, sipas legjislacionit në fuqi.
2. Mbi veprimet e kryera sipas parashikimit më sipër, drejtuesi i OFL-së informon Drejtorin e Përgjthshëm të Policisë së Shtetit dhe prokurorin kompetent, sipas parashikimeve të këtij akti normative”, përcaktohet në nenin 33.
Akti normativ i qeverisë ka shkaktuar reagime të shumta të organizatave të ndryshme, kryesisht atyre në mbrojtje të të drejtave të njeriut, ndërkohë që sikundër ka raportuar “Zëri i Amerikës”, vendimi në fjalë nuk është konsultuar me BE dhe SHBA, sikundër është deklaruar rëndom nga zyrtarë të qeverisë.
Në përgjigje të interesimit të Zërit të Amerikës për paketën e re ligjore, një zëdhënës i ambasadës amerikane në Tiranë nuk mundi të jepte një vlerësim për të pasi, siç u shpreh zëdhënësi, “Nuk kemi pasur mundësi që ta studiojmë variantin më të fundit të legjislacionit “Anti-KÇK”. Presim që të kuptojmë detajet” duke theksuar se “E vlerësojmë shprehjen nga Kryeministri të vendosmërisë dhe vullnetit politik për të luftuar murtajën e krimit të organizuar”.
Edhe zyra e Delegacionit të Bashkimit Evropian në Tiranë, duket se nuk është e informuar për paketën ligjore të miratuar sot. Përfaqësia e BE-së i tha Zërit të Amerikës se “Delegacioni i Bashkimit Evropian nuk e ka parë aktin normative të miratuar sot dhe nuk mund të bëjë komente në këtë moment”. /BN/
