Kreu demokrat Lulzim Basha është takuar paraditen e sotme me banorët e Shkozetit, banesat e të cilëve u dëmtuan nga tërmeti i 26 nëntorit. Ai ka ngritur zërin për faktin se qeveria nuk ka vullnet që 150 milionë dollarët e ndarë për oligarkët, t’ua kalojë njerëzve të mbetur pa shtëpi.
Në bashkëbisedim me banorët, Basha tha se arsyeja nuk është padija por korrupsioni, pasi ato para, 150 milionë usd, nuk janë vetëm për oligarkët, por edhe për qeveritarët që ua japin.
“Unë do të bëja anulimin e koncensioneve dhe kalimin e ndihmës te njerëzit”, tha Basha.
Ai tha se pasi kaluan dy muaj dhe nuk ka asnjë ndryshim, sot nuk ka asnjë vlerësim të dëmeve, asnjë njeri që të ketë marrë faturën dhe të thotë “kaq është dëmi i shtëpisë tënde”!
“Jam shumë i shqetësuar, sepse kjo po fillon të futet në dimensionin e tretë të krizës. E para, shëndeti i të sëmurëve, të moshuarve, të fëmijëve; e dyta, gjendja e biznesit, që duhet të ma thoni pa doreshka se si është dhe e treta, ndërkohë që filloi viti buxhetor, po fillon të lëvrojë paratë, 150 milionë dollarë për oligarkët i ka – ndërsa këtej presin konferencën e donatorëve për të dhënë bonuset e qerasë dhe dëmshpërblyer shtëpitë”, theksoi Basha
Referuar planit me 5 pika të propozuar nga opozita për ndihmën ndaj biznesit, Basha theksoi se nëse shuhet biznesi në Durrës, nëse fiket ky motor ekonomik, do ta pësojë e gjithë Shqipëria.
“Tirana dhe gjithë Shqipëria. Dhe nuk propozuam gjëra të reja, por modele që i kanë zbatuar vende që kanë pasur fatkeqësi të tilla. Konkretisht, Italia. Pra, propozuam gjëra të përballueshme… Këtë do të bëja unë: Anulimin e koncensioneve, kalimin e ndihmës tek njerëzit”, tha Basha.
Qytetarët i kanë treguar Bashës faturat e energjisë elektrike për një pallat që është shpallur i pabanueshëm.
“Juve harruan t’ju ndihmojnë, ndihma jo, strehim jo, faturat nuk i harruan! Faturat e energjisë në një pallat të pabanuar!”, ironizoi Basha.
