Policia italiane ka vënë në pranga dy persona, njëri prej tyre shqiptar, pasi kishin tentuar t’i shpëtonin kontrollit rutinë të policisë.
Mediat fqinje shkruajnë se të arrestuarit janë shtetasi italian M.M., 31-vjeç dhe shqiptari U.T., 37-vjeç.
Pas kapjes, policia konstatoi se italiani kishte me vete dokumente identiteti false, por me fotografinë e tij, ndërsa shqiptari kishte dokumente false rumune me fotografi dhe gjeneralitete të tjera.
Hetimet zbuluan se M.M. ishte në arrati ai kishte një dënim për gati dy vite për të vuajtur, sepse akuzohej për një seri krimesh në të kaluarën, përfshirë vjedhjet e shumta, grabitjet, riciklimin e makinave, drogën dhe rrëmbim personi.
Ndërsa shqiptari U.T. nga ana tjetër, ishte kthyer në Itali në mënyrë klandestine, pasi ishte dëbuar dhe shoqëruar në kufi, pas një ndalimi për grabitje.
Si ndodhi arrestimi?
Ndjekja nëpër rrugët e Zanicës, Itali u realizua mëngjesin e së hënës, 9 dhjetor, kur dy burra me një makinë tip “Citroen C4” u përpoqën t’i shpëtojnë një kontrolli rutinë të policisë rrugore të Bergamos. Pas urdhrit të policisë për të ndaluar, ata u nisën me shpejtësi nëpër rrugët e qytetit, duke marrë edhe drejtime të gabuara e duke kaluar kryqëzimet me semaforë të kuq.
Më pas ata arritën në rrugën shtetërore afër Stezzano, ku lanë makinën dhe u futën në fusha dhe përfunduan duke ikur në këmbë. Por patrulla e policisë vazhdonte t’i ndiqte.
Të dy tashmë të arrestuarit u përpoqën të arratiseshin në këmbë, por iu zu pritë nga një patrullë, e cila ishte thirrur për përforcime. /Panorama/
