Edhe rrethi i Hasit është prekur nga tërmeti i datës 26 nëntor. Deri sot, sipas Emergjencave Civile të Bashkisë Krume, po bëhet verifikimi i banesave për të cilët banorët janë ankuar. Për FaxNews ka folur specialisti i Emergjencave Civile, Man Rada, i cili deklaroi se deri tani janë inspektuar gjithsej 114 banesa, nga të cilat 60 kanë dalë me dëmtime të rënda.
“Nga dy grupet e punës të ngritur nga Shtabi i Emergjencave janë verifikuar deri tani, gjithmonë verifikimet janë bërë në bazë të listave që kanë dërguar kryetarët e fshtarave, kryetarët e bashkive dhe qytetarët, janë verifikuar 114 banesa. Jemi ende në verifikm.
Nga verifikimet që kemi bërë në terren me grupet e emergjencave ka shtëpi të plasaaritura, ka shtëpi që janë të dëmtuara në masë të madhe për të cilat ne nuk japim dot një përgjigje. Deri tani kemi verifikuar 114 shtëpi, ndërsa në proces sipas kërkesave kemi edhe 36-37 shtëpi, për të cilat po punohet që nga data 26. Grupet e verifikimit nuk kanë pushuar asnjë sekondë.
Nga verifikimi jonë mund të jenë rreth 60 e ca banesa që kanë dëmtime të mëdha, ndërsa banesat e tjera kanë dëmtime, kanë plasaritje, por ato mund t’i vlerësojë grupi i vlerësimit”, tha ai.
Sipas tij, deri tani është kërkuar vetëm një çadër për strehimin e një banori, por nuk ka ardhur ende. “Kemi bërë një kërkesë për një çadër, por deri tani nuk ka ardhur. Banori akoma nuk është pajisur. Ai banon në një dhomë të shtëpisë që i plotëson kushtet për banim”, u shpreh Man Rada.
Ai bëri me dije se godinat shkollore nuk janë prekur nga tërmeti, ndërsa dëme të lehta ka pësuar një qendër shëndetësore. /Faxnews/
