Nga Boldnews.al
Burime nga Prokuroria e Durrësit deklarojnë për “Boldnews.al” se kryetarja e Bashkisë së Durrësit, Valbona Sako, ka qenë kundër prishjes së ndërtimeve të dëmtuara nga tërmeti, para se të kryhej ekspertiza dhe hetimi penal për të saktësuar shkakun e shkatërrimit të tyre.
Këmbëngulja e Sakos, sipas të njëjtave burime, ka hasur në kundërshtimin e drejtuesve të Komisionit Qendror të Emergjencave, të cilët kanë vendosur prishjen e disa prej ndërtesave të dëmtuara.
Kjo përplasje duket se shënoi edhe fundin e raportit politik ndërmjet Sakos e Partisë Socialiste, duke u shoqëruar me dorëheqjen e saj, të njoftuar paraditen e kësaj të Diele, e justifikuar me përdorimin e një shprehjeje të gabuar, të bërë nga ana e saj në media.
Prej dy ditësh, punonjësit e IKMT-së kanë nisur rrëzimin e godinave të dëmtuara në Durrës, duke zhdukur elementë të shumtë që do të ndihmonin hetimin penal për të zbuluar nëse pasojat tragjike të tërmetit kanë lidhje me kushtet e ndërtesave dhe lejet e ndërtimit.
Ndërtesat e rrëzuara në Durrës, në pjesën më të madhe, janë ngritur në kohën kur kryetar i Bashkisë së qytetit ishte Vangjush Dako.
Burimet nga Prokuroria e Durrësit ngrenë dyshimet fillestare se, pikërisht, për provat që mund të implikonin Dakon apo zyrtarë të tij, trupat e IKMT-së, nën drejtimin e Komisionit të Emergjencës, kanë nisur prishjen me ngut të godinave që kanë dalë jashtë funksionit.
Argumenti zyrtar për rrëzimin total të godinave është shmangia e rrezikut që sjellin ato ndërtime.
Ndërkohë, burimet konfidenciale të akuzës së Durrësit nuk e përjashtojnë mundësinë e tentativës për “zhdukje të provave”.
Gjithësesi, të njëjtat burime flasin se, pavarësisht rrëzimit total të godinave, sërish ka shumë elementë për të kryer hetime e për të konkluduar nëse ka përgjegjësi nga ana e zyrtarëve dhe, nëse po, cilët prej tyre do të përballen me ligjin penal.
