Kryeministri Edi Rama paralajmëroi ndryshime ligjore për të siguruar abuzimin me ndërtimet.
Mëngjesin e sotëm, qeveria zhvilloi një mbledhje të jashtëzakonshme në lidhje me situatën e rëndë pas tërmetit të 26 nëntorit, që deri më tani ka shkaktuar 50 viktima.
Në mbledhjen e sotme, Rama ka vënë theksin tek abuzimi që është bërë me ndërtimet në Shqipëri, gjë që siç e pranoi dhe ai, çoi në këtë bilanc tragjik.
Më tej, kreu i qeverisë tha se kushdo që abuzon me lejet e ndërtimit, do të ketë sanksione të forta dhe dënimi do të jetë nga 7 deri në 15 vite burg.
“Kujt ti kërkosh përgjegjësi që një qytet u ndërtua në det? Atyre që thanë se kjo është mrekullia e tetë e botës? Ashtu ka qenë koha. Por, ata që do të abuzojnë, sanksione të forta. Për të gjithë ata që abuzojnë me lejet e ndërtimit, pa përjashtim, do të dënohen me 7 deri në 15 vite burg. Do ketë burg për sponsorizuesit, burg për ndërtuesin burg dhe burg për arkitektin nëse abuzohet”, tha ndër të tjera kreu i qeverisë.
