Kryqi i Kuq i Maqedonisë së Veriut do të merret me organizimin dhe mbledhjen e mjeteve. Drejtori i këtij institucioni, Sait Saiti tha se tashmë janë nisur disa mjete nga Maqedonia për në Shqipëri. Megjithatë, sipas tij ajo për të cilën tani Shqipëria ka nevojë janë mjetet financiare, me qëllim, rimëkëmbjen sa më të shpejtë të zonave të dëmtuara, shkruan Gazeta Express-Maqedoni.
Ai tha se periudha në vazhdim do të jetë më e vështirë, në kuptim të asaj që do të duhen më shumë mjete financiare për rindërtimin e banesave dhe shtëpive, si dhe sajimin e të dëmeve të mëdha materiale që ka shkaktuar tërmeti në Shqipëri.
Mes të pranishmëve ishin artistët: Ajtuna Sejdiu (Tuna), Bejsana Kasami (Big Mama), Mimoza Mustafa, Lori, Fifi, Adnan Daci, Agim Hajrullau, Adnan Kamberi,Enes Seferi, Beqir Aliu, Dj Nikk dhe shumë të tjerë. Si një nga iniciatorët ishte edhe biznesmeni i njohur Enver Maliqi, ndërsa fjalë rasti iu dha edhe kryetarit të Odës Ekonomike të Maqedonisë Veri Perëndimore, Nebi Hoxha, i cili njoftoi që bashkë me biznesmenët shqiptarë kanë arritur të mbledhin mbi 100 mijë euro, mjete këta për të cilat ai u zotua se do përfundojnë në duart e nevojtarëve në Shqipëri.
Këngëtarja Tuna Sejdi është një prej artisteve që është përfshirë më shumë në Maqedoni për të ndihmuar shqiptarët përgjatë kësaj kohe që kur ndodhi tragjedia , në të cilën humbën jetën 49 persona.
“Sot më datë 28.11.2019 ne ora 11.00, ne ‘Four, Park Hospitality Group’ me mbështetje te Kryqit te Kuq te Republikës se Maqedonisë Veriore, bashke me koleget dhe miqtë e mi nga Kosova, Shqipëria dhe Maqedonia mbajtëm pres konferencën me iniciativën e përbashkët për te grumbulluar donacione për ndihmën dhe mbështetjen e viktimave te prekura nga tërmeti në Shqipëri”, ka shkruar Tuna.
Sipas Tunës, deri me tani janë mbledhur 2 milionë e 467 mijë denar apo përkthyer në euro 40 075.1 euro.
Njëkohësisht këngëtarja nga Shkupi ka bërë thirrje edhe tek bizneset në Maqedoni që të japin kontributin e tyre.
