Tërmeti që goditi Shqipërinë mëngjesin e së martës, shkaktoi të paktën 30 viktima dhe disa qindra të plagosur.
Gjimnazi Sami Frashëri në Tiranë ka ndërmarrë një nismë, e para mes shkollave të mesme, duke iu bashkuar solidaritetit të shprehur më herët nga qytetarët, për të ndihmuar të gjitha familjet e prekura nga tërmeti.
Ditën e sotme, 27 nëntor, nga ora 15:00 deri në orën 19:00, gjimazi Sami Frashëri, ka hapur dyert për mbledhjen e ndihmave, veshje dhe ushqime, që do të dërgohen pranë familjeve të prekura.
Organizatorët e nismës i kanë drejtuar një apel të gjithë nxënësve dhe familjeve të tyre, që t’i bashkohen dhe të lehtësojnë sadopak dhimbjen dhe vështirësitë që po kalojnë me qindra familje të prekura nga tërmeti.
“Ndihma më e vogël e juaja ka peshë të madhe për dikë”, thuhet në mesazhin e shpërndarë nga gjimnazistët.
Nisma e gjimnazistëve të “Sami Frashërit” mund të shërbejë edhe si një apel, jo vetëm për shkollat e mesme, por edhe për organizatat, që në fakt duhej të ishin të parat që duehj të reagonin në aspektin qytetar.
