Një tërmet i fortë, me magnitudë 6.4 të Shkallës Rihter, me epiqendër në Adriatik, shumë afër Durrësit, ka shkaktuar viktima dhe të plagosur, ndërkohë që nuk ka një bilanc mbi ndërtesat që janë dëmtuar.
Numri i viktimave ka arritur në 13, ndërkohë që ka ende persona që ndodhen nën rrënoja dhe shpresa është që të shpëtohen.
Në ndihmë të Shqipërisë janë nisur Forcat e Sigurisë nga Kosova, por edhe trupa të specializuara nga Greqia, Italia dhe Rumania, që pritet të angazhohen në operacionet për përballimin e situatës.
Boldnews.al solidarizohet me familjarët që humbën personat e dashur në këtë tragjedi, si dhe me të gjithë të lënduarit, numri i të cilëve është rreth 600.
Gjithashtu stafi i Boldnews.al shpreh mbështetjen për të gjitha forcat e angazhuara në operacionet e shpëtimit, si dhe me qytetarët që po ndihmojnë në kapërcimin e situatës tragjike.
