Një ditë pasi Prokuroria për Krime të Rënda kërkoi konfiskimin e resortit të Isuf Brahimajt, i cili është vrarë me një shpërthim të telekomanduar 28 gushtin e 2014, kanë reaguar edhe familjarët. Ata shprehen se nuk u intereson vendimi që do të merret për ndërtesën por i kërkojnë shtetit që të gjejë vrasësit e të vëllait. Anila Merkaj, motra e Brahimajt pohon se vëllai i është vrarë nga vrasës me pagesë. Ajo shprehet për Rport TV, se Isufi i kishte thënë përpara se të vritej se Julian Sinanaj e ndiqte prej kohësh.
“Julian Sinanaj u rrinte mbrapa vëllezërve të mi se kur ka ndodhur atentati me ML dhe me motorin vëllai që ka iku Isufi kur e ka parë në televizor ka thënë që ky na rrinte mbrapa në një lokal që këta pinin kafe. Julian Sinanaj ka folur për këto dhe ka thënë që minën e motorit e kam përgatitur unë dhe që atëherë prokuroria ka shumë për të gjetur por s ka bërë asnjë gjë”, – shprehet ajo.
Shpetim Brahimaj, babai i Isufit pohon për Report Tv se nuk u intereson çfarë do të bëjë gjykata e prokuroria me Hotelin, por duhet të angazhohen që t’i japin një përgjigje se kush ia vrau djalin
“Kjo për mua është djerrë se mua më iku djali dhe nuk më duhet fare dhe atje le të mbetet, atje le të shkatërrohet dhe ti vihet edhe dinamiti dhe ta hedhin poshtë. Por kam vetëm një gjë se do ngrihen brezat afër dhe do kthejnë sytë lartë që kjo qe e jona dhe u bë kështu prandaj i lutem shtetit i lutem të gjitha instancave që merren me këto punë të më japin një orientim për djalin, të më thonë një gjysmë llafi të ma thonë dhe në vesh nëqoftëse nuk ma thonë dot drejtpërdrejtë”, u shpreh ai.
Më tej babai i Isuf Brahimajt shprehet se godina nuk është ndërtuar me para të pista, edhe pse djali i tij është dënuar në Itali për trafik droge./ shqiptarja.com
