Prej muajsh Shqipëria është në krizë, jo vetëm politike, por edhe sociale dhe ekonomike. Një krizë që sot pranohet edhe nga ndërkombëtarët, referuar edhe rezolutës më të fundit të PPE-së që apelon për dialog për zgjidhjen e krizës, e cila nëse vijon mund të çojë vendin drejt katastrofës.
E ndërsa Edi Rama prej ditësh ka zgjedhur të qëndrojë larg debateve, duke hedhur në “fushë” për konsum mediatik disa prej Rilindasve të tij, ministrat kanë menduar të argëtohen duke organizuar kampionate kalçetos mes dikastereve që drejtojnë.
Dhe siparin e kampionatit të futbollit mes Ministrive e ka çelur Ministria e Bujqësisë, e drejtuar nga Bledi Çuçi, me atë të Arsimit që drejtohet nga Besa Shahini.
I pari po përballet me protestat e fermerëve, që hedhin prodhimet e tyre në rrugë se nuk kanë treg ku t’i shesin, apo për shkak se qeveria i ka nxjerrë jashtë skemave të subvencioneve, para që shkojnë te oligarkët e lidhur me qeverinë.
Ministria e Arsimit përveç protestës së 4 dhjetorit që organizohet nga studentët, ka edhe një problem madhor, që janë tekstet shkollore të mbushura me gabime. Por, prioritet mbetet kampionati qeveritar.
Por duket se as protestat, as skandalet dhe as gabimet, nuk i shqetësojnë ministrat e Ramës, që në një skemë tipike rilindase, me një propogandë që e kanë për zemër, kërkojnë të tërheqin vëmendjen, të krijojnë idenë se gjithçka ecën mbarë dhe gjithçka që denoncohet është false.
Nuk dihet nëse kampionatit mes Ministrive do t’i bashkohet edhe Erjon Veliaj me ekipin e tij, megjithëse ai është kryebashkiak.
Por meqë mini-kampionati organizohet në Tiranë, për të mund të bëhet një përjashtim, dhe nuk është çudi që Lali të shfaqet vetëm në finale, për të tentuar marrjen e “kupës”.
