Ledio Braho, avokat i njohur, e konsideroi propozimin për dërgimin e çështjes së Gjykatës Kushtetuese në Komisionin e Venecias, si jo një zgjidhje të duhur.
Braho tha se Venecia nuk mund të zëvendësojë Gjykatën Kushtetuese.
“Komisioni i Venecias mund të japë opinione, por jo vendime të detyrueshme për t’u zbatuar.
Ja kemi rastin e Presidentit, Komisioni i Venecias solli një opinion që lexohet dhe interpretohet në mënyra të ndryshme. Kjo do të ndodhë edhe në rastin e Kushtetueses.
Nëse duan që opinionet e Venecias të jenë të zbatueshme atëherë le ta shkruajnë në Kushtetutë që ato janë të detyrueshme për t’u zbatuar.
Por mendoj se kjo nuk ka të bëjë me një shtet serioz, por me një shtet qesharak, që për çdo gjë, i sugjerohet të shkohet në Venecias”, tha Braho.
Ai shtoi se edhe sikur çështja për Kushtetuesen t’i dërgohet Komisionit të Venecias, sërisht do të jemi në një ngërç, pasi opinioni do të interpretohet në mënyra të ndryshme dhe do të vijojë debati pa zgjidhur ngërçin.
