Partia Socialiste deklaroi se dekreti i Presidentit Nishani, që një ditë më parë caktonte datën 11 shtator për mbajtjen e zgjedhjeve në Peshkopi, është i pavlerë për sa kohë nuk është zbardhur vendimi i Gjykatës Kushtetuese.
Deputetja Blerina Gjylameti tha se, ky është një vendim personal i kreut të shtetit dhe i kërkoi që ta tërheqë atë, pasi sipas socialistëve është në kundërshtim me Kodin Zgjedhor.
Partia Demokratike, me anë të zëdhënëses Ina Zhupa, theksoi se “Edi Rama mori sot në mbrojtje një prej akteve më të rënda që ka provokuar mbarë shoqërinë shqiptare, siç ishte favori seksual që kërkoi Shukriu i tij në Dibër në këmbim të një vendi pune”.
“Duke sulmuar Presidentin e Republikës, për shpalljen e dekretit të zgjedhjeve në Dibër, Edi Rama u rreshtua në krah të abuzimit me pushtetin, në krah të perversitetit, në krah të aktit të ish-kryetarit të Bashkisë së Dibrës, akt të cilin e ka dënuar cdo shqiptar, i majtë, i djathtë i paparti. Pretendimi i sotëm i Edi Ramës është fare qesharak nga ana ligjore, pasi Gjykata Kushtetuese, e cila rrëzoi kërkesën e Shukriut për të qendruar në detyrë, e njofton Presidentin me shkrim, dhe nuk ka nevojë në këtë rast ta publikojë vendimin në fletoren zyrtare. Kodi Zgjedhor thotë qartë se data e zgjedhjeve caktohet jo më herët se 30 ditë dhe jo më vonë se 45 dite nga data e vendimit të Gjykatës Kushtetuese, dhe se Presidenti i Republikes është i detyruar ta dekretoje datën brenda 48 orësh nga njoftimi i Gjykates Kushtetuese. Gjykata Kushtetuese e ka njoftuar Presidentin zyrtarisht në të njëjten datë me vendimin, pra me 1 gusht. Dekreti i Presidentit është plotësisht sipas ligjit”.
Më pas ka reaguar edhe Presidenca e cila ka mbrojtur vendimin e Nishanit.
“Kushtetuesja na njoftoi për vendimin e shkarkimit në 1 gusht. Sipas rregullores data e zgjedhjeve në Dibër u caktua në 11 shtator. Keqardhje për përhapjen e informacioneve të pavërteta. 48 orë nga njoftimi, presidenti dekretoi datën e zgjedhjeve. Presidenti kërkon zhvillimin e lirë e të drejtë të zgjedhjeve”, u shpreh zëdhënësi i presidencës.
