Nënkryetari i KQZ-së, Denar Biba, reagoi sot lidhur me veprimin e Arta Vorpsit, e shpallur si anëtare e Gjykatës Kushtetuese nga KED dhe Rilindja, e cila zgjodhi të betohej para noterit, në një kohë që Kushtetuta parashikon që anëtarët e kësaj gjykate betohen para Presidentit të Republikës.
Nuk dihet pse Vorpsi zgjodhi të shkojë para noteres dhe të noterizojë një deklaratë, ndërkohë që veprimi i saj shkaktoi reagime të shumta.
Ndër personazhet publike dhe juristët që u përfshinë në debat ishte edhe nënkryetari i KQZ-së, Denar Biba.
Por disa momente më pas, ai ka fshirë reagimin. Nuk dihet sepse Biba u përfshi në debat dhe më pas u tërhoq, por mes rreshtash në reagimin e tij, ai shprehte habinë sesi një profesioniste që e di shumë mirë se çfarë thotë Kushtetuta, ndërmerr një veprim individual.
Ndoshta ky qëndrim i Bibës nuk është në frymën e Rilindjes, e cila njoftoi se do të mblidhte Kuvendin në një seancë të jashtëzakonshme, lidhur me dekretimin nga ana e Presidentit të Marsida Xhaferllarit si anëtare të Kushtetueses.
Pritet që Kuvendi të rrëzojë dekretin e Presidentit, duke e trajtuar si një dekret normal, në një kohë që emërimet në Kushtetuese janë kthyer në një kaos.
Kjo për faktin se Kuvendi shkeli procedurat, duke plotësuar vakancën e dy vendeve në një ditë të vetme, ndërkohë që Kushtetuta parashikon një rradhë në veprim. Kështu sipas Kushtetutës, Presidenti zgjedh anëtarin e parë në vakancën e shpallur, më pas rradhën e ka Kuvendi që plotëson një vakancë, dhe Gjykata Kushtetuese që plotëson 1 nga 3 vendet që i takojnë.
Referuar kësaj, Kreu i Shtetit ka përcaktuar Besnik Muçin për vakancën e shpallur për një vend, dhe i takonte Kuvendit që të plotësonte vakancën për vendin e shpallur prej tij, por në fakt votoi për dy vakancat njëherazi.
