KLP ka zbardhur renditjen e kandidatëve për kryeprokurorin e ri. I pari është Olsian Çela me 459 pikë, i pasuar nga Arta Marku me 406 pikë. E treta renditet Fatjona Memçaj me 362 pikë.
Kreu i KLP-së Gent Ibrahimi sqaroi se kandidatët kanë 3 ditë afat për të bërë ankim, megjithatë shtoi se shpreson të mos ketë të tilla.
Kushtetuta parashikon që Këshilli i Lartë i Prokurorisë realizon renditjen e tre kandidatëve, nga ai me pikë më shumë, tek ai me më pak. Tre emrat i dërgohen Parlamentit, i cili duhet të zgjedhë brenda 30 ditëve një prej 3 kandidaturave, me një shumicë të cilësuar prej 84 votash. Në rast se nuk arrihet kuorumi, Prokuror i Përgjithshëm zgjidhet kandidati i renditur i pari në listë.
Pra, përzgjedhja e Këshillit të Lartë të Prokurorisë mund të jetë vendimtare, në rast se nuk gjendet konsensusi politik në Parlament.
