Kryeministri Edi Rama tha se nuk është as tradhëtar dhe as hero, ndërsa shprehu vendosmërinë lidhur me nismën e mini-Shengenit Ballkanik. Pas akuzave që hodhi në drejtim të liderëve të Kosovës, për të cilët tha se janë vetë-izoluar, duke pasur parasysh mospjesëmarrjen në takimet e zhvilluara, Rama tha se me kokëfortësinë që ka, do i shkojë deri në fund punës që ka marrë përsipër.
Madje nga Ohri, Rama këshilloi lidershipin politik në Kosovë se nuk mund të fitojë pikë, duke sulmuar Kryeministrin e Shqipërisë.
Reagimet e Ramës erdhën pas kritikave të shumta të politikanëve në Kosovë dhe Tiranë, që e konsiderojnë mini-Shengenin Ballkanik një “Jugosllavi të re”.
“Nëse dikush mendon në Kosovë se fiton pikë duke më sulmuar mua, nuk më rezulton. Le ta bëjë. Është e përkohshme. Janë pikë që i merr era.
Ajo që duhet të bëjë një udhëheqës është të shohë dhe të udhëheqë edhe me koston që në momentin e parë.
U bëra tradhtar kur shkova në Beograd dhe u ktheva si hero. Nuk jam as tradhtar dhe as hero.
Jam thjesht një njeri që e kam shumë seriozisht këtë punë që kam marrë përsipër dhe do e bëj me gjithë kokëfortësinë që kam.
Pastaj do të më gjykojnë faktet, njerëzit, historia. S’ka problem”, tha Rama.
