Komisioni Qendror i Zgjedhjeve vendosi me 5 vota pro ndërprerjen e mandatit për Agim Kajmakun, kryebashkiakun e Rilindjes për Vorën, dalë nga votimet monopartiake të 30 qershorit.
Në studion e News 24, nënkryetari i KQZ-së, Denar Biba, përfaqësues i Rilindjes, u shpreh se me denoncimet e saj Partia Demokratike shkoi përtej mundësive të KQZ-së, madje ia kaloi edhe Prokurorisë së Përgjithshme.
“Letra e Gazmend Bardhit drejtuar KQZ ishte pa asnjë dyshim një formë presioni. Është për t’u përgëzuar PD, sepse ishte iniciatore, si duket pati informacionet, dhe shkoi përtej mundësisë së KQZ, madje edhe Prokurorisë, për Kajmakun e të tjerët.
KQZ ka qenë korrekte kur iu ka kërkuar institucioneve shqiptare, jo të huaja, të dhëna për kandidatët. KQZ nuk ka asnjë lloj mundësie që të ketë kontakte apo informacion se çfarë kanë bërë shqiptarët jashtë shtetit. PD duhet përgëzuar, por letra ishte një lloj presioni”, tha Biba.
PD ka denoncuar prej të paktën dy muajsh rastin Kajmaku, duke publikuar dokumente që vërtetonin se ai ishte arrestuar në Greqi për falsifikim parash, madje duke i publikuar edhe identitetin që kishte përdorur, Jorgo Toto.
Kajmaku mohoi akuzat, madje u mor në mbrojtje edhe nga Kryeministri Edi Rama.
Në fakt pas dy muajsh, Prokuroria e Përgjithshme konfirmoi akuzat e PD-së, ndërsa Kajmaku humbi mandatin për shkak se nuk kishte deklaruar në formularin e dekriminalizimit se kishte probleme me drejtësinë e vendit fqinj.
