Kryetari i komisionit parlamentar të Sigurisë Kombëtare, Spartak Braho, i është drejtuar me një shkresë zyrtare ministrit të Brendshëm, Saimir Tahiri.
Në letrën e tij, Braho i kërkon ministrit informacion mbi grabitjen e rëndë të ndodhur në aeroportin e Rinasit, ku u vodhën rreth një milion euro, në pistën e fluturimeve.
Ngjarja e ndodhur një javë më pare mbetet ende e pazbardhur, ndërsa Policia e Shtetit dhe kompania konçesionare TIA vazhdojnë t’ía kalojnë përgjegjësinë njëra-tjetrës per kete ngjarje te rende.
LETRA E BRAHOS
Drejtuar: Zotit Saimir Tahiri
Ministër i Punëve të Brendshme
I nderuar zotit Ministër!
Komisioni për Sigurinë Kombëtare në mbledhjen e datës 04.07. 2016, krahas projektligjeve “Për kontrollin kufitar” dhe “Për ratifikimin e marrëveshjes ndërmjet Qeverisë së Republikës së Shqipërisë dhe Qeverisë së Shteteve të Bashkuara të Amerikës për shkëmbimin e informacionit për verifikimin e terrorizmit”, me kërkesën e anëtarëve të Komisionit diskutoi dhe trajtoi me shqetësim ngjarjen e ndodhur në datën 30.06.2016 në Aeroportin ‘Nënë Tereza’ Tiranë.
Anëtarët e komisionit në diskutimet e tyre analizuan dhe vlerësuan këtë ngjarje si një precedent që ka cënuar rendin publik dhe sigurinë kombëtare, ngjarja e cila kërkon vëmendjen maksimale në trajtimin e saj dhe marrjen e masave përkatëse nga ana tuaja në një kohë sa më të shkurtër. Ndërkohë nga anëtarët e komisionit u kërkua nxjerrja e përgjegjësive nga institucionet përkatëse si Ministria e Punëve të Brendshme, autoritetet Aeroportit, shoqëria e sigurimit etj, si dhe u sugjeruan një sërë masash disiplinash, administrative e penale ndaj personave përgjegjës për pasojat e rrjedhura nga kjo ngjarje.
Në këtë kuadër, duke qenë se kjo ngjarje ka nevojë për një trajtim dhe analizë më të thelluar dhe informacion më të plotë, u kërkua nga Komisioni që ai të informohet nga ana e Ministrisë së Punëve të Brendshme lidhur me gjithë problematikën e mësipërme, duke shmangur çështjen edhe detajet konkrete që janë objekt i hetimit nga organet e prokurorisë. Informacioni i lartpërmendur do të jetë i disponueshëm vetëm për anëtarët e komisionit për Sigurinë Kombëtare dhe Kryetarin e Kuvendit. Jemi në pritje të informimit tuaj në një kohë sa më të shkurtër.