Policia Bashkiake e Tiranës ka sekuestruar dje karrocën e kokoshkave të një shitësi ambulant.
Por ndërsa karroca është vendosur mbi automjetin e policisë bashkiake, edhe shitësi ambulant ka hipur me makinën e bashkisë për të mbrojtur bukën e gojës.
Një prej punonjësve i ka tërhequr vëmendjen duke i thënë se është makina e shtetit, por edhe qytetari jo pak i indinjuar ka thënë se është i shtetit dhe deklaron se ka paguar taksat.
Videoja është publikuar nga Nisma Thurje e cila këshillon qytetarët’ të mos shesin kokoshka se do prezantohen me shtetin’.
“Shteti i kokoshkave. Vidhni banka! Vidhni fonde! Vidhni popullin! Vrisni njerëz! Ndërtoni pallate pa leje, bëni ç’të doni nuk ka problem. Askush nuk ju kap dot. Veç mos shisni kokoshka. Aty do prezantoheni me shtetin! Shtetin tonë qesharak!!!”, shkruan Nisma Thurje.
Kjo nuk është hera e parë që policia e Veliajt vepron ndaj më të dobëtve. Edhe pak kohë më parë bashkiakët i morën makinën e kokoshkave një gruaje dhe më pas pati masa për policët që kryen veprimin. Por përsëritja e të njëjtit ritual tregon se policia bashkiake vepron me urdhër nga lart.
