Zbulohen tri goditjet e Skënderbeut për sa u përket lojtarëve me perspektivë për të ardhmen. Bëhet fjalë pikërisht për tre futbollistë nigerianë, një mbrojtës i majtë, një mesfushor qendre dhe një sulmues krahu, të cilët kanë bërë edhe një prove te bardhekuqtë para dy javësh.
“Panorama Sport” mëson se mes 8 lojtarëve që ishin pjesë e kësaj prove me Skënderbeun, stafi dhe trajneri Shehi kanë zgjedhur që të besojnë te tre, të cilët kanë dhënë sinjale të mira në një javë qëndrimi në Korçë. Tre futbollistët e përzgjedhur janë njoftuar që të mbërrijnë sërish pranë ekipit kur ky i fundit të nisë grumbullimin.
JUSUF LAVAL- Profili i parë i lojtarit të përzgjedhur nga ana e trajnerit Orges Shehi ka qenë sulmuesi i krahut, Jusuf Laval. Bëhet fjalë për një futbollist nigerian, 21-vjeçar, që ka qenë pjesë e ekipit “36 Lion” në Nigeri.
Ndërkohë, është pikasur edhe nga belgët e Lokerenit, me të cilin ka luajtur dy takime, duke mos lënë shenjë. Duke parë faktin që Laval është në fund të kontratës së tij, e cila i skadon më 30 qershor, ai duket se ka zgjedhur destinacionin e tij të radhës. Nga sa bëjnë me dije burimet pranë gazetës, stafi teknik ka vlerësuar paraqitjen e Laval jo vetëm në ndeshje, por edhe gjatë javës së qëndrimit të tij në Korçë ka treguar se potenciali nuk i mungon.
KUDUS SULEJMAN OLARENUAJU- 21-vjeçari është një mesfushor qendre dhe në provën e tij te Skënderbeu duket se ka bindur drejtuesit e Skënderbeut. Ngjashmëria e tij është thuajse identike me profilin e Bakari Nimagës dhe kjo pak a shumë ka qenë përshtypja e parë që futbollisti ka lënë në juglindje.
Sulejman është pjesë e Vila Mea në kampionatin portugez, atje ku mbylli një sezon deri diku të mirë. Me portugezët është në fund të kontratës së tij dhe transferimi në Korçë bëhet akoma edhe më i sigurt për të. Përshtypjet janë pozitive për lojtarin, që fillimisht ka luajtur me Anderleht U-19 për t’u transferuar më pas në Portugali, fillimisht te Vila Real dhe më pas te Vila Mea.
ZHUNIOR- Nigeriani i tretë është mbrojtës i majtë, por mund të përshtatet lehtësisht edhe në krahun e djathtë. Arsyeja që mund të përdoret në disa pozicione është edhe një prej faktorëve që bindi korçarët. Zhunior (Babatude Sagbenu Pinponsu emri i plotë) ka mbyllur sezonin me Gil Vicenten dhe tani del si një lojtar i lirë.
Mosha e re dhe shpejtësia në veprimet nga krahët kanë tërhequr vëmendjen e klubit për këtë futbollist, duke vendosur që ta bëjnë pjesë të tyre. Pritet që të tre lojtarët të bashkohen me ekipin në fazë përgatitore para se të arrijnë akordin për firmosjen e kontratës.
/Panorama Sport
