Kryeministri Edi Rama ka zgjedhur t’i japë nga Lezha një mesazh opozitës, kur tha se ata që ikën nga zgjedhjet kanë zgjedhur të ikin në drejtim të paditur.
Me një fjalim të shkruar që hera herës e lexonte, Rama nuk ka kursyer batutat dhe fyerjet.
“Zgjedhjet pa opozitën kryesore janë anti-demokratike, vetëm atëherë kur ajo pengohet të mos hyjë në zgjedhje.
Por nëse ajo nuk do të hyjë në zgjedhje, atëherë kjo nuk ka lidhje fare me demokracinë.
Ato kanë frikë nga zgjedhjet dhe mendoni se çfarë rrumpalle dhe çorapi do të bëhej e gjithë jeta demokracie e vendit, nëse sot do t’i hapej rrugë një politike qorres dhe destruktive, që nisi me djegien e mandateve”, tha Rama.
Kryeministri theksoi se opozita ka në dorë vetëm veten e saj.
“ Ata na thonë duam që të ikni ju dhe të vijmë ne. Ata thonë duam një kryeministër që duam ne, po ku është parë kjo në një vend demokratik, në një shtet të së drejtës”, tha Rama.
Nga Lezha, kryeministri, njëherazi kryetar i PS-së, u shpreh se lojrat politike duhet të marrin fund.
“Ata janë dembelë, përtojnë edhe të mendojnë, dhe nxjerrin nga goja fjalë që çdo prind u thotë fëmijëve që s’duhet të përdoren. Janë edhe të paaftë, përveçse janë edhe dembelë, ndërsa ne jemi njerëz sit ë gjithë njerëzit, jemi të gabueshëm, por jemi punëtorë.
Ata janë frikacakë. E keni parë filmin “Beni ecën vetë” , e mbani mend kur humbi në pyll dhe këndoi me zë të lartë? Ndaj edhe këta bërtasin se kanë frikë.
Kanë frikë edhe nga reforma në drejtësi, janë në panik, ndaj janë në një rrugë që vetëm kokën e tyre mund të thyejnë, pasi Shqipërisë dhe shqiptarëve nuk i bëjnë dot asnjëgjë.
Ne jemi guximtarë, kemi guxuar të vendosim në programin tonë reformën në drejtësi, dhe ja ku jemi këtu, u votua dhe po zbatohet.
Po çlirojmë Gjykatat nga të korruptuarit dhe të papërshtatshmit që i kanë bërë çorap liritë e njerëzve dhe pronat.
Trimat nuk bëjnë dhunë, aq më tepër në një sistem demokratik, ku trimëria nuk matet me sa muskuj ked he si mundet ta kthesh veten në shkop dhe t’i gjuash tjetrit, por matet se sa reforma mund të bësh, që pavarësisht se nuk mbështeten shumë, janë e mira për të ardhmen.
Kush fle me qenin, gdhihet me pleshta”, tha Rama.
