Kryeministri Edi Rama ka zgjedhur t’i drejtohet me një letër publike, e shtata në rradhë, mbështetësve të opozitës, duke shtruar pyetjen a mundet që zgjedhjet demokratike të bëhen vetëm nëse do opozita? Rama shkruan në këtë letër se nuk ka njerëz të zakonshëm që të bëhen pjesë e një marrëzie kaq të jashtëzakonshme.
Ashtu si edhe në 6 letrat e mëparshme që ia drejtonte kreut të PD-së, Lulzim Basha, edhe në letrën e 7-të, Rama nuk ka harruar paralajmërimin se kush do të prishë zgjedhjet do të përballet me burgun.
Nënkryetari i PD-së, Edi Paloka, lidhur me letrën e 7-të të Ramës thotë se kryeministri nuk e ka përplasjen me demokratët por me shumicën e shqiptarëve. Nga ana tjetër, Paloka thotë se Rama e merr përgjigjen nesër.
”Përplasjen nuk e ka më vetëm me demokratët por më shumicën e shqiptarëve të djathtë e të majtë që e kanë kuptuar ose ca më keq e kanë pësuar çmendurinë kriminale të Edvinit. Përgjigjen e merr nesër”,-thotë Paloka për ”Koha Jonë”.
Ndërkohë ish-deputeti i PD-së, Luçiano Boçi, thotë se gjendja e rënduar pisko-politike e Ramës, ka ”prodhuar” këtë letër. Më tej ai thotë se Rama është peng i marrëzisë së vet dhe delirimeve pa fund.
”Rama është në një gjendje të rënduar psiko-politike dhe trajtimi më i mirë për të, kur projeksionet e tij i hedh në letër, është shpërfillja. Ai është sot peng i marrëzisë së vet dhe delirimeve pa fund. Zgjedhjet demokratike nuk mund të bëhen duke i blerë, vjedhur dhe grabitur votën qytetarëve. As duke aktivizuar falangat e krimit apo të bandës policore të qeverisë”, thotë Boçi
