Anëtarja e kryesisë së PD, Jorida Tabaku, komentoi rekomandimin e fundit nga Komisioni Evropian për të çelur negociatat për Shqipërinë. Në studion e A2CNN, Tabaku u shpreh që ky rekomandim që jepet sot për Shqipërinë dhe Maqedoninë e Veriut nuk është asnjë gjë të re.
“Është rekomandim i disatë për dy vendet që kanë qenë bashkë në procesin e integrimit dhe shpresoj që të mos ndahemi, pasi nëse për Maqedoninë e Veriut do të hapeshin negociatat, për Shqipërinë do të ishte më e vështirë.
Ky vendim i Komisionit nuk përbën lajm të ri, lajm i ri do të ishte nëse vendet anëtarë do merrnin vendimin për hapjen e negociatave”, tha Tabaku.
Gjithashtu, ajo shtoi se hapja e negociatave është një proces merite që bazohet tek arritjet e Shqipërisë. Sipas saj, Shqipëria, në fushat që priteshin arritje si reforma në drejtësi, lufta kundër korrupsionit nuk ka pasur rezultate, madje është shënuar regres.
