Ish-kryeministri Sali Berisha akuzoi maxhorancën dhe kryeministrin Edi Rama se tallet me qytetarët dhe se do të fusë drejtësinë në kthetrat e tij.
“Sot dhe çdo ditë opinioni publik është i gozhduar tek kjo reformë sepse ky sistem ka nevojë jetike për tu reformuar. Sistemi kapitalist mbijeton në saj të reformave. Edhe ky do të binte nëse nuk do të kishte reforma perpetua mobile. Ndaj kjo reformë është jetike për këtë sistem. Por çfarë apo ndodh? Shqiptarët po shohin çdo ditë forcat regresiste që duan ta përdorin reformën për të futur drejtësinë në kthetrat e tyre. Ky qëllim ogurzi ishte shkaku i kundërshtimit të opozitës që ditët e para të fillimit të reformës. Në kohën kur opozita ofronte pjesëmarrjen e saj ishte kryeministri i vendit ai që refuzonte dhe që iu thoshte të huajve se fjala konsensus në fjalorin e shqiptarëve nuk ekziston. Pavarësisht nga ky qëndrim, pavarësisht se në historinë e këtij vendi përveç njërës që dështoi reformat nuk ishin bërë pa konsensusin e 2 palëve”, tha Berisha.
Sipas tij Edi Rama përjashtoi opozitën. “Po ç’bëri opozita, opozita shpëtoi reformën. E kuptoi se Edi Rama me reformë kupton kthetrat e tij të zeza mbi drejtësinë. Nënkupton deklarimin e tij vetë kryeprokuror, vetë kryegjykatës, vetë kryehetues. Drafti që përgatit bashkëkryetari komunist i komisionit të drejtësisë, Fatmir Xhafaj shkoi në Venecia. Venecia e rrëzoi draftin, si një draft që nxirrte shqiptarët jashtë hapësirës evropiane. Si një draft që qeveria donte të bëhej edhe ekzekutiv i drejtësisë. Venecia rrëzoi draftin si një draft që rrëzonte pavarësinë e drejtësisë. Opozita çoi dokumentet që faktonte”, tha ai.
Berisha theksoi më tej se maxhoranca është tallur me qytetarët shqiptarë.
“Këta janë shakaxhinj të reformës. Janë tallur me qytetarët shqiptarë. U kthyen vendimet e Venecias, e drejta kaloi në anën e opozitës por këta nuk dinë se ç’ështe e drejta”, u shpreh ai.
