Tre kandidatë në rradhët e socialistëve synojnë Bashkinë e Gjirokastrës.
E ndërsa përzgjedhja e kandidatit që zyrtarisht do të përfaqësojë PS-në në këtë bashki në zgjedhjet lokale të 30 qershorit pritet të vendoset nga kreu socialist Edi Rama dhe Asamblea Kombëtare, në selinë qendrore të PS-së janë përcjellë 3 emra.
Asamblea e socialistëve të Gjirokastrës, ku kanë qenë të pranishëm edhe ministri Bledi Çuçi, ish-ministrja Mirela Kumbaro, ka propozuar deputetin Flamur Golemin dhe zv.ministren Artemis Malo, ndërkohë që Armand Hilaj, kryetari i Këshillit të Qarkut, është vetëpropozuar për të qenë kandidat.
Mësohet se kandidatura më pranë përzgjedhjes është ajo e Flamur Golemit.
Asamblea Kombëtare e PS-së do të mblidhet në Tiranë më 11 maj ku pritet të zyrtarizohen kandidatët e PS-së për 61 bashkitë e vendit, ndërsa afati i fundit për regjistrimin e kandidatëve në KQZ është data 13 maj.
Partitë e opozitës së bashkuar, të drejtuara nga PD, kanë deklaruar se nuk do të marrin pjesë dhe nuk do të lejojnë një process zgjedhor farsë më 30 qershor, ndërsa kanë kushtëzuar pjesëmarrjen në zgjedhje me dorëheqjen e Edi Ramës nga posti i kryeministrit dhe krijimin e një qeverie tranzitore.
Në anën tjetër socialistët kanë krijuar një koalicion, Aleanca për Shqipërinë Europiane, me rreth 24 parti, ku përcaktohet ndarja e pushtetit në qeverisjen lokale në varësi të peshës elektorale të çdo partie.
