Duket se socialistët do të përcaktojnë kandidatin për kryebashkiak të Durrësit në limitet kohore.
Burime nga PS e Durrësit bëjnë të ditur për gazetën “Bulevard” se ende deri tani nuk ka një emër të vendosur për të kandiduar për kreun e bashkisë.
Deklarimet e fundit të Dakos se ai do të drejtojë fushatën janë një lloj ngushëllimi për socialistët që kishin menduar se do ta kishin të sigurtë dhe një mandat, për herë të 3-të për kryebashkiakun e Durrësit.
Edhe pse për të gjithë emrat që qarkullojnë janë dy apo tri që mund të jenë kandidatë, ajo që po i lë pa gjumë socialistët është se kryeministri Rama ka kërkuar një emër gruaje në drejtimin e Bashkisë së Durrësit, shkruan Bulevardnews.
“Po është e vërtetë edhe pse nuk po thuhet që Rama ka thënë që do të duhej një grua në bashkinë e Durrësit dhe kjo ka vënë në lëvizje shumë njerëz, ndërsa ajo që duket është se nuk ka emër potencial që mund të përballoj një garë të tillë përjashto dy gratë deputete të Durrësit Milva Ekonomi dhe Klodiana Spahiu, të cilat kanë dhënë prova në fushatë”, është shprehur një nga drejtuesit e PS në Durrës.
Por duket se Rama nuk ka ndërmend të tërhiqet nga bindja e tij, se tashmë duhet një grua në drejtimin e bashkisë së Durrësit, që do të ishte edhe e para në historinë e demokracisë, që kjo bashki të drejtohej nga një femër.
Të pyetur nga “Bulevard” se kur mund të kemi një emër, askush në PS nuk i përgjigjet, ndërsa thonë se atë e vendos Rama, por që në fakt të gjithë janë grupuar pas emrave që i parapëlqejnë që të jenë kandidat.
