Një godinë e vjetër dhe e amortizuar në lagjen nr. 7 në Durrës është kthyer në shqetësim serioz për banorët, pasi një pjesë e strukturës së çatisë është shembur gjatë natës.
Ngjarja ka ndodhur rreth mesnatës dhe fatmirësisht nuk ka pasur të lënduar, por ka shkaktuar frikë te banorët që jetojnë në objekt dhe pranë tij. Pas incidentit, policia bashkiake ka rrethuar zonën me shirita sigurie.
Banorët thonë se ndërtesa është në gjendje të rëndë dhe rreziku është i vazhdueshëm.
Disa prej tyre shprehen se kanë frikë të qëndrojnë në shtëpi, pasi pjesë të tjera të godinës mund të bien në çdo moment, sidomos kur në zonë luajnë edhe fëmijë.
Sipas tyre, godina ka qenë dikur magazinë e Fabrikës së Cigareve dhe është përshtatur më pas për banim.
Ata kujtojnë se që pas tërmetit të vitit 2019 dëmtimet janë shtuar, por nuk është ndërhyrë për rikonstruksion.
Banorët i bëjnë thirrje institucioneve të marrin masa urgjente, duke thënë se situata është bërë e papërballueshme dhe rreziku për jetën e tyre mbetet i lartë çdo ditë.
