Deputeti Lefter Maliqi, i cili nuk ka pranuar të jetë pjesë e asnjë prej grupimeve parlamentare, ka kërkuar një interpelancë me ministren e Drejtësisë, Etilda Gjonaj.
“Të dashur miq besoj dhe shpresoj që Z.Gramoz.Ruci ta miratoj sa më shpejt interpelancën me Ministren e Drejtësisë Znj.Gjonaj në bazë te rregullores së Parlamentit dhe Kushtetutes pasi do ketë supriza.
E vërteta i dhëmb politikanëve, por i sherben popullit. Mbetem zëri i tyre dhe në shërbim të tyre.
Për mua s´ka vlerë mandati i deputetit para mirënjohjes ndaj votuesve dhe të vërtetës”, shkruan në një postim Maliqi.
Sipas tij, qëllimi i kësaj interpelance do të jetë kundra fenomeve korruptive në administratën e burgjeve.
Në këtë mënyrë duket se deputeti i Qarkut të Beratit mund të përdorë informacione, përfshirë edhe përgjime, mbi atë çka ndodh në një nga hallkat që ka të bëjë me sistemin e drejtësisë, vendet e vuajtjes së dënimit.
Pas publikimit të përgjimeve nga Zëri i Amerikës mbi komunikimet e zyrtarëve të Rilindjes, kryebashkiakëve dhe deri ministrave me pjesëtarë të grupeve kriminale për tjetërsimin e votave, ndoshta ajo çka do të denoncojë apo do të thotë Maliqi në interpelancën me ministren e Drejtësisë, mund të jetë një tjetër tronditje.
Maliqi ka mbajtur pozicionin e nëndrejtorit të Përgjithshëm të Burgjeve, deri në momentin që mori mandatin e deputetit, çka do të thotë se ai njeh shumë mirë problematikën në sistemin e burgjeve.
Dhe po të kihen parasysh akuzat që janë bërë herë pas here mbi ndikimin e personave që vuajnë dënimet në proçeset zgjedhore apo ndikimin e politikanëve të ndryshëm duke përdorur personat që vuajnë dënimet, ndoshta denoncimet që mund të bëjë deputeti Maliqi mund të hedhin dritë edhe më shumë mbi këtë fenomen.
Gjithsesi gjithçka mbetet për tu parë, se çfarë do të denoncojë apo deklarojë deputeti Maliqi.
“Detajet do t´i mësoni nga fjalimi im”, ka mjaftuar të njoftojë deputeti i Qarkut Berat.
