Mbi 1300 policë janë angazhuar sot lidhur me protestën që do të mbajë opozita në bulevardin “Dëshmorët e Kombit” pasditen e së shtunës. Protesta do të nisë në orën 18:00, ndërsa kohëzgjatja e saj do të përcaktohet nga vetë protestuesit.
Ndërkohë mbi 1300 policë, përfshi këtu edhe efektivë të reparteve special si Shqiponjat, FNSH dhe RENEA, do të jenë të përqëndruar pranë kryeministrisë, dhe brenda saj. Ndërkohë që makina me ujë do të jenë në gadishmëri për të hyrë në veprim nëse situate do të precipitojë.
Ashtu si edhe në protestat e tjera të opozitës, pritet që në lartësitë e institucioneve do të vendosen efektivë të policisë dhe gardës, që monitorojnë nga lart situatën, kryejnë fotografi dhe xhirojnë protestuesit.
Godina e Kryeministrisë është rrethuar me gardh metalik, i vendosur në trotuar, pas të cilit do të qëndrojnë efektivët e policisë.
Ndërkohë që mësohet se në pikat hyrëse dhe dalëse të Tiranës do të ketë kontrolle të mjeteve, veçanërisht atyre që bëjnë transportin e organizuar të mbështetësve të opozitës nga rrethe të ndryshme të vendit.
