Edi Rama ka postuar në rrjetet sociale një foto nga një aeroport europian, ku shfaqen ushtarë që patrullojnë. Kryeministri ka bërë një krahasim mes fotos së postuar dhe vendimit të marrë nga qeveria për angazhimin e trupave të ushtrisë në ruajtjen e aeroportit “Nënë Tereza”. Por situatat që përpiqet të krahasojë Rama janë krejt të tjera.
Ushtarakët që patrullojnë në aeroportet europiane kanë lidhje me rrezikun terrorist, pra sulmet terroriste. Ndërsa në Tiranë, nuk ka pasur ndonjë alarm për sulm terrorist. Madje edhe kur e gjithë Europa, në 2016, i trembej sulmeve terroriste dhe angazhoi trupat e armatosura pas ngjarjeve në Bruksel dhe Paris, në Tiranë u shtua prezenca e forcave të policisë në aeroport, dhe u kryhen patrullime me qen.
Ndërkohë sot, Rama ka vendosur të pozicionojë Forca të Armatosura, ndërsa përpiqet të legjitimojë një vendim të tillë me atë se kjo ndodh edhe në vendet europiane.
Postimi i Edi Ramës
Forcat ushtarake në aeroportet e Parisit, Venecias, Frankfurtit dhe Amsterdamit, janë vendosur ashtu si në plot vende të tjera të Europës dhe botës demokratike, si reagim ndaj akteve cënuese për sigurinë e infrastrukturave aeroportuale dhe qytetarëve që i përdorin ato.
Ndërkohë beretat e kuqe të policisë sonë ushtarake janë vendosur thjesht në ruajtje të perimetrit të jashtëm të sigurisë.
Prandaj kush flet për shkelje kushtetute, gjendje lufte, juntë ushtarake e marrëzira të tjera si këto, le të gjejë ndonjë arsye tjetër për të treguar se sa shumë i dhimbsen Kushtetuta dhe standardet demokratike.
