Administrata amerikane duket se do të angazhohet për zgjidhjen e krizës politike në Shqipëri. Ashtu si në vitin 2017, SHBA kanë zgjedhur një prej zv.Ndihmësve të Sekretarit amerikan të Shtetit, për të udhëtuar drejt Shqipërisë dhe për të folur me politikanët shqiptarë.
Më datën 9 prill vjen në Shqipëri zyrtari i lartë amerikan Matthew Palmer, i cili do të takohet me kryeministrin Edi Rama dhe kreun demokrat, Lulzim Basha.
Duket se Palmer do të angazhohet për gjetjen e një zgjidhjeje dhe eksperiencat shqiptare kanë treguar se asnjë nga palët politike nuk refuzon ndërhyrjen apo këshillën amerikane.
Kjo ndodhi edhe në 2017, kohë kur Hoyt Yee, vinte në Shqipëri dhe arriti gjetjen e një zgjidhjeje politike mes palëve.
Palmer është Zëvendës Ndihmës Sekretar në Byronë e Çështjeve Evropiane dhe Euroaziatike të SHBA, me përgjegjësi për Ballkanin Perëndimor dhe Egje.
Më parë, ai ka mbajtur postin e drejtorit të Zyrës së Evropës Jugore Qendrore. Ai flet serbisht, greqisht dhe japonisht.
Palmer së fundmi ka realizuar disa vizita në vendet e Ballkanit, si në Maqedoni dhe Greqi, ku ka këshilluar për situatën politike në vend.
