Ish-Kryeministri i Turqisë Binal Yıldırım, kandidati i partisë së Erdogan në Stamboll, tha se votat e pavlefshme në zgjedhjet e së dielës, gjithsej 319.500, tejkalojnë dhjetra herë diferencën e votave, duke shtuar se rivali i tij Ekrem Imamoğlu nga opozita Partia Republikane Popullore (CHP), aktualisht, kryeson me 25.000 vota më shumë.
“Ka gjithsej 31136 kuti votimi. Nëse një votë është plotësuar me parregullsi në çdo kuti këto janë 31.136, që është më shumë se diferenca”, tha Yıldırım.
Ai gjithashtu falënderoi të gjithë banorët e Stambollit, duke theksuar se Komisioni i Lartë Zgjedhor i Turqisë do të duhet të thotë fjalën e fundit.
Duket se qëndrimi që do të mbajë partia e Erdogan në Stamboll është i njëjtë me atë të Edi Ramës në 2009, kur kërkonte hapjen e kutive, pas zgjedhjeve parlamentare.
Nuk dihet nëse AK do të kërkojë deri në fund të njëjtën gjë, apo do të pranojë humbjen në një prej qyteteve më të mëdha.
“Ne, sot e tutje, nuk do të kërkojmë më thjesht hapjen e kutive, por largimin e Sali Berishës, përderisa kutitë nuk hapen. Hap kutitë ose largohu – kjo do të jetë kryefjala e protestës sonë. Protesta jonë do të shtrihet në të gjithë Shqipërinë, përmes një opozitarizmi që do të jetë kudo që shqiptarët përballen me pushtetin e së keqes”, deklaronte Rama në 2009.
Ndryshimi është se Rama në atë kohë ishte në opozitë dhe kërkonte largimin e Kryeministrit, ndërsa Erdogan është në pushtet dhe me kontrollin që ka mbi institucionet mund të ndikojë në hapjen e kutive dhe ndoshta tjetërsimin e rezultatit.
Mbrëmjen e së dielës Yildrim shprehej i bindur për fitoren duke thënë:
“I falënderoj shumë qytetarët e Stambollit në këtë proces për mandatin që na e kanë dhënë. Shpresoj që rezultatet të jenë në të mirë të Stambollit dhe vendit tonë. Faleminderit Stamboll”.
Kjo është një goditje shumë e madhe për Erdogan, pasi humbi Ankaranë pas plot 25 vitesh si dhe Izmirin, tashmë edhe Stambolli është drejt humbjes së sigurtë.
Rezultatet e dobëta në qytetet kryesore përkthehet edhe si rezultat i zhgënjimit me politikat e Erdogan, ku lira është zhvlerësuar me 500% duke bërë që çmimet të rriten shumë. Inflacioni në Turqi ka arritur në 20%.
