Në mbledhjen e zhvilluar paraditen e kësaj të hëne, Këshilli i Lartë i Prokurorisë ka caktuar përkohësisht në pozicionin e drejtuesit të Prokurorisë së Shkallës së Parë të Lushnjes, prokurorin Arben Dyla, ndërsa në atë të Fierit, prokuroren Violeta Shkurta, që të dy me nga 7 vota pro.
Vendimet vijnë pas shkarkimit nga KPK të Çlirim Shahinit, ish kryeprokurorit të Lushnjes, dhe Fatmir Lushit, ish-drejtuesit të Prokurorisë së Fierit.
Nga viti 2003 deri në vitin 2008, Dyla ka mbajtur detyrën e kryeprokurorit në Mat. Ndërsa në vitin 2008, është emëruar prokuror në Prokurorinë e rrethit në Lushnje. Edhe në vitin 2015, Arben Dyla u komandua drejtues në Prokurorinë e Lushnjes. Ndërsa Violeta Shkurta mban detyrën e prokurores në Fier, që prej vitit 2003.
Ndërkohë, po në këtë mbledhje, me 10 vota pro është deklaruar mbarimi i statusit të magjistratit për prokurorin Ardian Nezha, i cili kishte dorëzuar pak ditë më parë një kërkesë për dorëheqjen.
KLP-ja ka për detyrë, bazuar në ligjin për “statusin e magjistratit” të caktojë emërime të përkohshme për një periudhë 3-mujore, për të mos krijuar pengesa në funksionimin normal të Prokurorive nga mungesa e drejtuesve. KLP-ja vendosi që propozimet konkrete të vijnë nga Komisioni i Karrierës. Sa i përket shortit për Komisionin e Posaçëm për Vlerësimin e kandidatëve për SPAK-un, për kandidatët joprokurorë, Tartar Bazaj triumfoi përkundrejt kandidaturave të Nurihan Seitit dhe Gent Ibrahimit. Bazaj do të jetë kështu anëtari i pestë i këtij komisioni, ku nga ana e anëtarëve prokurorë, në KLP është Besnik Cani. /BN/
