Nuk duhet të rrini në lokale me njëri-tjetrin. Kreu demokrat Lulzim Basha është treguar i prerë me anëtarët e Kryesisë së forcës politike që drejton, por edhe ndaj ish-deputetëve, të cilët nuk kanë qenë të angazhuar aq sa duhet gjatë protestave të organizuara nga opozita.
Burime nga PD shprehen se në mbledhjen e Kryesisë dhe ish-deputetëve, Basha kërkoi nga ata që sot përbëjnë kupolën drejtuese të forcës më të madhe të opozitës, të vihen në krye të protestave, jo vetëm në Tiranë, por edhe në rrethe.
“Nuk duhet të rrini në kafe me njëri-tjetrin, por në ballë të protestës. Duhet të angazhohemi në zonat e caktuara. Duhet të ketë protesta në rrethe, sipas problematikave që kanë qytetarët. Aktivet e çdo dege duhet të mblidhen përgjatë javës, ndërsa do të ketë protesta të përhershme kur ka parlament”, mësohet të jetë shprehur Basha.
Burimet theksojnë se gjithashtu kreu demokrat u ka ka kërkuar ish-deputetëve të tij që të intesifikojnë takimet me qytetarët.
Duket se reagimi i kreut demokrat ka ardhur pasi në protestat e fundit të opozitës, ka rënë në sy fakti që anëtarë të Kryesisë nuk kanë qenë të angazhuar. Madje mediat kanë publikuar foto, ku anëtarë të kryesisë kanë zgjedhur të qëndrojnë në lokale dhe të ndjekin zhvillimet nga ekranet televizive sesa të jenë në krah të protestuesve.
Protesta e rradhës së opozitës është caktuar më 13 prill para Kryeministrisë, ndërsa ajo do të nisë në orën 18:00. Kjo pritet të jetë një tjetër protestë e madhe, ashtu sikundër ato të zhvilluara më 16 shkurt dhe 16 mars.
