Opozita do të zhvillojë të enjten protestën e rradhës, ndërsa Kuvendi do të mblidhet në seancë plenare. Protesta do të nisë në orën 09:30, ndërsa ajo do të jetë e ngjashme me tubimet e zhvilluara prej 16 shkurtit, kur nisi edhe aksioni I ri opozitar.
Në të njëjtën ditë me protestën, Prokuroria e Tiranës ka vendosur që të thërrasë kreun demokrat Lulzim Basha dhe ish-Sekretarin e Përgjithshëm të PD-së, Arben Ristani, për të dhënë shpjegime lidhur me kontratat e lobimit në SHBA.
Hetimet në Tiranë lidhur me kontratat e lobimit kanë nisur rreth 1 vit më parë, ndërsa nuk dihet sepse tani organi I akuzës ka “nxjerrë” dosjen në sipërfaqe. Ndoshta është rastësi që riaktivizimi I hetimeve përkon me nisjen e aksionit opozitar dhe dorëzimin e mandateve nga deputetët e opozitës.
Burime nga prokuroria bëjnë të ditur se gjithçka ka të bëjë me përgjigjet e letërporosive të mbërritur në Shqipëri nga SHBA. Referuar këtyre dokumenteve, prokuroria ka menduar të kërkojë shpjegime nga kreu demokrat dhe ish-Sekretari I Përgjithshëm, Arben Ristani.
Bëhet fjalë për 4 kontrata të lidhura me një kompani të huaj, ndërsa shumat e dhëna, thuhet në letër-porosi, kishin qëllim promovimin e kauzës së PD dhe liderit të saj kur opozita ishte e ngujuar në çadrën e protestës.
Rreth 1 vit më parë, Arben Ristani, ka dhënë shpjegime në organin e akuzës lidhur me këtë hetim. Në atë kohë ai u shpreh se “u paraqita në Prokurori pas urdhrit të Taulant Ballës. Dëshmova mbi pagesat e PD për lobim. Prokurorët morën indicie nga kontratat e publikuara në SHBA. PD ka zbatuar me përpikmëri kontratat. PD nuk ka asgjë për të fshehur në këtë histori”.
Në SHBA nën hetim është marrë Nick Muzin, dëshmia e të cilit nuk ka mbërritur në Tiranë, për shkak të ligjit amerikan.
Muzin është nën hetim nga FBI-ja, jo vetëm për vonesën e deklarimit në Departamentin amerikan të Drejtësisë, të shumës prej 150.000 USD, paguar nga “Biniatta Trade”, por edhe për arsyen e pagesës.
